大家去長灘島都一定會去玩 Island Hopping。所謂既Island Hopping，全程約2.5-3小時，船家會帶大家去一至兩個長灘島上的景點或鄰近的島嶼觀光，例如Puka Beach、Crystal Cove及Crocodile Island 等；另外再會帶你去一至兩個浮潛點，部分更會包埋午餐。
不過，此文章的重點並非介紹何謂 Island Hopping，而是向大家推介一下 Island Hopping 的浮潛好去處！當然，此文章較適用於包船玩的朋友～因為跟團的話就無法決定去邊個浮潛點的啦！如果大家係無興趣去 Crystal Cove 觀光的話，可以善用時間浮潛，可以去到兩至三個浮潛點架！
A. Iligi-iligan Beach
推介度: ★★★★☆
特色：浮潛點位於一個大岩石的後方，水深約2米，水流較弱。而該處以硬珊瑚為主，偶有海星。魚類方面品種較少，但數量仍是很多的。由於該處水流較弱，所以普遍都是較年輕細條的魚為主。全年皆適合浮潛。
十分推介此浮潛點！因為係蝶魚既天堂！附近海域都係以藍頭蝶魚為主，大部分都是比較年幼及細條，十分可愛！而且完全唔怕人！會游到十分近，甚至會咬到你既手指！當然唔會痛啦～
B. Crocodile Island
推介度: ★★★★★
特色：浮潛點位於 Crocodile Island 與 Boracay 之間，水深約 1-2米，水流較強。該處有大量硬及軟珊瑚，軟珊瑚之中更有大量小丑魚！除此之外，海洋生物品種亦十分多，除了不同種類，成雙成對的蝶魚外，更有巨型海刺及較罕見的棘泡 ( 旅遊時常見被人製成標本手信既有刺雞泡魚 )、箱魨 ( 成個盒仔咁既魚 )、角鐮魚 ( 神仙魚 ? )，甚至水蛇！不過該浮潛點水流較強，體力要求較高。較適合於雨季其間水流較弱的時候去。
個人認為該處是長灘島浮潛的最佳地點！
不論品種及數量都十分多！甚至比去 Angol Point scuba diving 既時候更多！而且有好多軟珊瑚，如果大家唔想去 scuba diving 但係又想同 Nemo 一齊游水影相的話就最岩啦！
要注意的是，我總共去過該浮潛點兩次，曾遇到帶有劇毒的水蛇。聽船家講，該水蛇的毒性是眼鏡蛇的8倍！大家如果不幸遇到水蛇的話，保持冷靜，慢慢游開即可，因該蛇是不會主動襲擊人的。
C. Crystal Cove
推介度: ★★★ ★ ☆
特色：位於 Crystal Cove 的背面，水深約2-3米，水流較強。該處較少旅客會去，亦不會有 Sea ranger 黎收 20peso Snorkeling fee。該處主要以硬珊瑚為主，珊瑚品種多而且特別，更有不同的海洋生物及海星等。較適合於雨季其間水流較弱的時候去。
該處魚類的數量較少，亦較怕人，唔會好似其他浮潛點既魚咁游到你隻手度食野。不過船家帶我去呢個浮潛點都係因為我想睇海星，而該處亦的確都多好多不同種類的海洋生物。另外，該處的硬珊瑚色彩更鮮艷，非其他浮潛點可以比美！
D. Bulabog Beach
推介度: ★★★☆☆
特色：無需坐船，水深1米以下。可以自行沿沙灘及大石行出海，可以見到超級大量的海星及海膽。
其實 Bulabog Beach 是推介給各位海星狂熱者的重口味浮潛點，並非一個正式的浮潛點，而該處近岸的水質亦較差，長滿海草。不過如果大家唔介意的話，是可以自行行出海，行約50米水質就會變得清澈，可以同大量既粉紅色海星影相！不過一定要著鞋！因為真係有好多海膽架！
浮潛小貼士：
1. 大家去浮潛記得買定梳打餅去餵魚啦！記住係梳打餅，唔係麵包呀！唔會一落水就發漲散開，耐食好多架！去 Budget Mart 及一般便利店都可以買到！
2. 仲有就係，大家浮潛既時候記得眼看手勿動，因為海洋生物可能會有毒或具攻擊性！而大家想搵海星影相的話，記得唔好拎上水面！海星又係十分脆弱既生物來的，影完相就好好的將佢地放回原位！
3. 仲要切記唔好踏在硬珊瑚之上呀！硬珊瑚係好脆好易碎架咋！而硬珊瑚隨時要一年或以上的時間才會生長1cm！而且浮潛既時候都見到好多硬珊瑚已經開始白化及枯死，如果大家仲想去到長灘島可以睇到咁美麗既海洋生態，就記得保護環境及生態啦！
如有任何問題，歡迎留言，盡我所能為你們解答！
如有任何問題，歡迎留言，盡我所能為你們解答！
沒有留言:
張貼留言