今日要玩一生第一次的水肺潛水 ! 好緊張刺激 !!
一起身... 又做每日起身第一件事 ! 睇下天氣如何先 !
因為天氣都好影響到潛水 ! 陽光好的話個海會好清好靚 ! 睇野都好好多 !
正 ! 陽光普照 ! 出發 !
起身食返個早餐準備今日既活動 !
其實早上於 D'Mall 食早餐既選擇不太多，都係以 Cafe 為主
今次揀左 D'Mall 入面呢間 Big Mouth
叫左兩份 Pancake Meals，每份只係 165php
Pancakes 係即煎的 ! 無 The Pancake House 果種淡淡的蕉味... 不過真係好大份 ... Pancakes 超級厚...完全食唔哂
食完早餐就出發去潛水啦 !!
天氣太好... 不禁要在沙灘留個字 !
隻 B 好得意 !!
我地參加既係 Discover Scuba Diving
潛點間間 Diving Centres 都係一樣...於 Angol Point，由 station 2 坐船去大約 5-10 分鐘
係一個讓初學者體試一下潛水樂趣既課程
就算你唔識游水都可以參加 !
其實我覺得長灘島既海底世界都幾靚架... 所以都幾建議大家不妨一試 !
我地預約左早上十一點，一去到就見到早上 08:30 果班潛水人啦 !
課程主要包括三部分
1. 講解 / 睇片
2. 於淺水區練習不同潛水技巧
3. 出海潛水 !
首先我地坐低聽下教練 Heyes 介紹基本潛水裝備 ( 唔係間間都係真人發聲架 ! 有 D diving centres 只會好似香港補習社咁播碟俾你睇 ! ) 同埋手勢 ( 落水講唔到野架嘛 ! )
全程大約 20 分鐘，中途仲不斷問問題，睇下我地記唔記得！
之後就係去淺水區同 Diving master 一齊練習同埋試一試 D 潛具
Diving master 係當地人，不過由於之前已經講解哂，所以主要都係以手勢及簡單英語溝通及練習，而香港人教練就在附近幫手影相同埋幫你放鬆心情！
主要練習既潛水技巧包括於運用呼吸器呼吸、水底清理鏡內既水，清理口腔既水等等
而我地就另外再練習一下其他技巧！
用大約 20-30 分鐘已經可以掌握到 !
準備好就可以出發啦 !
其實第一次潛水當然會好緊張又刺激 !
但落到水只需要放鬆就可以了 ! 應該話... 最重要就係放鬆 !!
加上要不停反壓及維持呼吸... 就可以靜心欣賞美麗既海底世界 !
落水當然要餵魚啦 ! 好多好多魚呀 !
Diving master 全程都在身後照顧我地及身兼水底推進器 ! 真係連踢水都唔洗架 !
Nemo !
哈 ! 呢個就係我地額外練習既技巧啦 !
潛完水仲有證書仔一張，純粹留為紀念 ~
睇落好似好好玩 ! 其實真係好好玩 !
不禁要再講一次...
The world is just awesome !
不過我全程潛水都有耳仔痛，花左好多時間而可以成功反壓 ( 即係將身體既壓力及水壓作平衡 )
不過好在個 Diving master 一直都有照顧住我地，如果反唔到壓就會升返高少少，反完壓再試下潛深一點，又不停按摩我地既耳仔
呢個時候之前學左既手勢就好有用啦 ! 有無事都係靠運用不同手勢同 diving masters & 教練溝通 !
題外話
潛水影相果陣記得唔好俾個 " like" 既手勢呀 ! 果個手勢係解上水呀 ! 哈哈
仲有... 經過今日既 Discover Scuba Diving 同埋尋日 Island Hopping 既浮潛
已經發現長灘島既珊瑚開始出現鈣化既情況
即係珊瑚死緊啦 !
我地所見既硬體珊瑚其實係一種動物 + 植物同時生長既野
沙灘上見到白色既就係珊瑚骨，即係珊瑚既動物果部分
而我地於水底肉眼見到硬珊瑚有不同顏色，係因為珊瑚骨上生了唔同顏色既藻類
動物及植物互相依賴生存
而呢種藻類對水溫及水質變化都好敏感...當水溫上升就會大量死亡
而失去了藻類為珊瑚骨提供養份自然係唇亡齒寒 ...
所以於長灘島既水底已有不少灰白的珊瑚碎... 睇到都心痛
除此之外... 潛水既時候記得唔好踏在珊瑚之上 又或者捉住珊瑚借力 !
因為珊瑚其實好脆弱 ! 而珊瑚骨生長速度極慢 ... 一年先會長一厘米咁多 !
你唔小心踏破了一個角... 隨時要等十幾年先生得返出黎 !
好奇怪點解潛水教練無提及呢樣野... 可能始終都係做生意的啦... ~
所以在 blog 中一定要提一提大家
落到水記得眼看手勿動 ! 海洋生態是十分脆弱的 !
我地除左欣賞之外，亦有責任好好保護大自然 !!!
潛完水等左一陣... DVD 就已經燒錄好啦 !!!
要多謝超快手既教練 Deka ! 衫都未換就幫我地燒碟 ! 果然係香港人 !
有點頭暈頭痛...耳仔都好唔舒服...一枝箭飛左返酒店...就嘔了 !
不過訓左一陣就好好多了 ~
話說尋晚走遍成條 white beach path 格價 ...
現總結一下有關長灘島玩 Discover Scuba Diving 有咩要注意啦 !
1. 價錢 !
公價最平每位 3,000php
價錢已包括教學，潛具租用，船費等
整個課程兩小時至三小時不等 ~
其實間間 Diving School 既開價都差唔遠... 所以... 要揀就要留意一樣好重要既野
就係水底拍攝服務收費 !
唔同 diving centre 既分別都好大 ... 試過一間要另加 800php ( 總數 ) , 一間要另加 400php, 仲有兩間唔需要加錢 !!
2. 時間 !
要注意既「時間」有三種
A.
玩 Scuba diving 既日子，記得唔好係你到達長灘島或者離開長灘島當日，氣壓改變會令身體出問題！
B.
玩 Scuba Diving 當日既時間，每間 Diving School 都會有唔同既時段帶你去潛水，通常都有 09:00，11:00，15:00 呢三個時段
我地就揀左 11:00，上完堂去潛水既時候應該就係最好陽光既時候啦 !
C.
課程時間，開頭問價既時候，有 Diving School 話全長 2 小時，另外就話 2.5 小時，又或者 3 小時
再問深入一點...間間真正潛水既時間都係 30-40 分鐘... 當然啦... 水底用氧氣樽自然局限左時間... 所以間間 diving centre 都係一樣既 !
咁時間相差在哪 ? 就係教學時間啦 ! 其實如果你學得快 ... 成個課程係可以兩個鐘完成的 ~ 但係間間 diving school 都會確保你的確係學識左先會帶你去潛水既 ~
所以課程時間其實好大彈性，純粹取決於你既學習速度
3. 教練 !
揀 diving centre 最緊要就係問埋教練及初學者人數比例 !
因為教練係可以最多一個人帶四個人落水 ! 所以一定要問清楚 !
於長灘島上不同既 diving centres 都係話 一個教練對兩個學員既 ~ 所以都好放心 !
而我地就最正啦，我地兩個人，再加另外兩個台灣既遊客，就有一個教練及兩個 Diving masters ( 類似助教 ) 同我地一齊落水 !
另外教授語言亦係值得留意既 ~
英文、德文、韓文、日文、普通話及廣東話都有！
如果你地係第一次潛水，建議都係搵廣東話既教練，因為個心真係會定好多！
4. Diving Centres 介紹
- Beach Life Diving Centre
- 位置: Station 2 與 Station 3 之間，於 Boracay Sands 隔離
- 價錢: 3000php 一位，2.5 小時，連水底拍攝
- 特色: 香港人開辦，數個香港潛水教練，份外有親切感及放心！
- 推介指數: ★★★★★
- 位置: Station 1 與 Station 2 之間，未到 Willy's Rock
- 價錢: 3000php 一位，2.5 小時，連水底拍攝
- 特色: 韓國人開辦，待客態度一流！
- 推介指數: ★★★★ ☆
- 位置: Station 2，由 D' Mall 向 Station 3 方向行 5 分鐘
- 價錢: 3000php 一位，2 小時，水底拍攝另加不多於 500php
- 特色: 於長灘島上較大規模，頗為出名！
- 推介指數: ★★★ ☆ ☆
- Water Colours
- 位置: Station 2，由 D' Mall 向 Station 1 方向行 20 步
- 價錢: 3000php 一位，2 小時，水底拍攝另加 800 php
- 特色: 極近 D' Mall，潛具極新！
- 推介指數: ★★★ ☆ ☆
休息完就要趕住出門口 ! 呢左咁多日都無認真睇過日落 !
一出門口 ! 又要見撻皮狗 !
好好笑 ! 佢維持左呢個伸懶腰既動作足足一分鐘 !!!!
之後我地就搭車去位於 Station 1 既酒店 Friday's 度睇日落啦 !
Station 1 既沙果然係幼滑好多 !
落住呢個日落... 唔想走 !!
睇完日落就行返去 Station 2，我地預約左於 Aria 食飯 ~ 在長灘島的最後的晚餐，當然要在沙灘上的餐廳浪漫一番！
Aria 都係長灘島既地標，就在 D'Mall 及 White Beach 之間，好多 Blogs 都有提及
點知 ... 唉 ! 又令我失望了 ! 唔係因為食物質素差... 而係我連食既機會都無 !
我地被安排了坐於 White beach path 附近... 不停地有路人撞我張登...
坐低左無耐 ... 就有 waiter 走過黎話廚房頂唔住了 ... 所有 orders 要至少一個小時後先開始煮
下 ?! 宜家七點咋喎 ! 晚市剛開始你廚房就頂唔住 ?!
一怒之下... 走 !
真係對長灘島「有名氣」既餐廳大失所望 !!!
之後去左附近既一間餐廳度食
Red Coconut !
坐既位置剛好相反，坐得最近海，仲要係坐四人位 !
食物係咪好過 Aria 我就唔知啦 ... 但係環境就一定好幾百倍囉 !
仲有好好聽既 Live band performance
八點前 Happy Hour 指定 Cocktails 買一送一 !
黎之前已經知道於長灘島飲酒好平 ! 終於有機會飲啦 !
170php 兩杯既 Mojito... 即係 20 HKD 都唔洗就有一杯 !!!
叫左 Potatoes Skins, Fried Calamaris, Carbonara, Steak n fries
食既時候仲可以睇住隔離既 fire dance ! 呵呵
仲要食食下又有煙花睇 !
突然之間覺得自己係一個有錢人
坐沙灘食晚飯... 有 Live band, fire dance, 仲要有埋 fireworks !
成晚一路食飯就一路玩緊腳下清涼既麵粉沙 !
正 !
在長灘島既最後一晚啦... 真係好唔捨得 !
走之前再去整多幾個 henna tattoo 過下我既紋身癮先 !
是但搵左一間於 D' Mall 附近既街邊鋪
自己設計左一個 design，想畫於上臂， 250php，ok !
其實 Henna tattoo 價錢係取決於圖案既大少
而我本身都好欣賞及尊敬呢類以一門手藝謀生既師傅
所以都唔太喜歡對住佢地殺價
上一次玩 henna tattoo 師傅係用膠片上照著圖案用墨水筆畫出草圖，再轉印於手上
今次呢個師傅係直接於手上用原子筆畫草圖 ! 絕對係真功夫 !!!
正 ! 同行既都忍唔住... 於耳後畫左粒星仔 ! 100php
畫畫下... 大家都發現到
呢個師傅真係堅野 ! 好有心機畫得黎，技術真係好 !
所以又忍唔住... 我地每人隻腳整多一個，好放心地等個師傅幫我地 freestyle 畫，每個 250php
原來畫腳... 真係佢又辛苦我又辛苦 !
我的係 mountains，另一款係 sea
不過真係好有心機 ! 欣賞 !
鋪頭位於 D'Mall 附近，向 Station 3 方向行一兩分鐘，見到一間 Fruit in ice cream 既雪糕店隔離就係啦 !
真心推介 !
認住佢 !
結果我地兩個總共用左 850php 哈哈 !
真係過足癮 !
玩完 Henna tattoo 就返酒店啦 ... 真係好唔捨得呢度 !
沒有留言:
張貼留言