1. 防水袋
之前的 blog 已經有提過，去完長灘島返黎真係覺得買左呢個袋係十分正確既決定 !
30L 大既防水袋... 足足有成隻手臂咁深 !
長灘島都幾風大浪大... 而船邊既蟹腳就會經常地整到你成身都係水 !
所以一定要有一個防水袋，去 island hopping / sunset sailing 就最岩 !
將財物、相機、毛巾、衣褲、潛具通通放哂入袋 !
真係跌左落水都唔洗擔心 !
而且清洗十分容易... 去完沙灘沖一沖水就無哂沙粒同太陽油 !
真係好方便 !
另外，一個容量大既袋仲有一個好處...
如果你去長灘島有寄倉行李的話，行李只限重 10kg ! 好容易就過磅 !
呢個時候就要將你行李入面既芒果乾同埋其他手信袋哂入 hand carry !
而且我買既時候都只係 $180，真係好抵 !
2. 防水相機袋
我於淘寶買了呢一種適合單反用的防水相機袋
約人民幣 125
用之前一定要做足測試，放張紙巾入袋
之後就拎左去游水 ~ 水面無問題 !
強行拉入水底近一米深都 ok ! 紙巾完全乾爽就放心啦 !
雖然呢個防水袋話佢自己可以潛到 30米
不過強國產物始終信唔過
我地都只係用黎防濺水或者浮潛既時候用的 ~ 並唔會拎去水肺潛水
正如早前所講... 長灘島個海真係好大浪 ! 無個防水袋袋住... 部相機隨時報銷 !
*Updated on 30/09/2012
其實呢個防水相機袋只能夠用黎防入水，我試過浮潛既時候用Canon 550D 試影
發現個袋好容易就沾上防曬，而在水面浮下沉下既時候係十分反光的
可能始終部機唔係用黎影水底相，又或者技術太差... 好難 focus，同埋所有相都勁藍
所以，都係用黎在船上防濺水比較實用～
3. 外幣兌換
去長灘島當然要兌換菲律賓 Peso
島上都有唔少兌換店, 主要係 1:4.5，以當時兌換率計...少左成 1php ! 好貴 !
所以千萬唔到去呢種黑店換錢 !
經驗之談... 發現有兩種方法係最抵的 !
* 當時港幣對菲律賓 Peso 約為 1 : 5.46
A. 到香港外幣找換店
我出發前 ( 18/01/2012 ) 去旺角數間兌換店睇過, 大約就係 1 : 4.3 至 1 : 4.5
食水十分深 !
所以建議去中環既百年找換店
以當日匯率黎講, 我去換既時候找換店既兌換率係 1:5.4
算係十分超值 !
以下係佢地既網址, 每日都會更新一次
http://bcel1985.blogspot.com/
不過呢間找換店好多人, 成日都排哂隊, 預留大約 20-30分鐘去兌換就差唔多啦
我就只係兌換了 $ 1,000，以應付到達長灘島之前的交通支出
B. 到長灘島櫃員機提款
睇下自己果張香港銀行既提款卡，如果背面有 「PLUS」，就即係可以於世界各地有同樣「PLUS」既櫃員機提款 !
以HSBC 為例，每次提款收 $25 手續費, 而菲律賓當地銀行亦會再收 200php 手續費
而每次最多只可以禁 10,000php
計返條數... 連手續費兌換率有 1:5.46 ! 仲抵過去百年換 !
長灘島都有好多櫃員機，以我所知D'Mall 近 Budget Mart 有一部，近 D'Mall 中心 附近又有，而Station 3 附近的 Boracay Sands 隔離都有
所以唔洗擔心無錢洗 ! 除非你銀行戶口無錢啦 !
*Update on 30/09/2012
於長灘島其間網上匯率約為 1HKD : 5.37PESO
中環百年找換為 1HKD : 5.29PESO
I. 長灘島上主要有三間銀行既櫃員機，分別係 BPI、Metro及Allied，而每間銀行既匯率都有唔同！
- BPI，有最多櫃員機，單單係 D'Mall 既食肆 Epic 後面就已經有三部 ！Main Road 近 D'Mall 仲有間分行，另外向 Station 3 行，近 Le Soliel De Boracay 酒店都有～
不過！！呢間銀行既匯率係最差的！計埋手續費只係得 1HKD : 5.26PESO。
- Metro，只見到 D'Mall Budget Mart 附近有一部，不過長期壞機。我試過入卡，完全 hang 左，等左足足五分鐘先嘔返張卡出黎，真係嚇死！千萬唔好試！！！
就係咁 hang 住左 !!! 嚇死 !!!
- Allied，都有唔少櫃員機，Station 2-3 之間既 Juice Bar 有一部，Station 3 既 Boracay Sands 附近都有，匯率最吸引，比中環百年換更抵！
呢度就係近 Juice Bar & Lonely Planet 既櫃員機入口，沿小巷行入去就會見到
II. 如果大家係經 Clark 轉機的話，於機場過左海關後會見到有一間找換店，一定一定一定要在呢間找換店換！只係 1HKD:5.32PESO，真係平到你唔信！唔洗諗！一定揀呢間！！！！！！
4. 天氣
菲律賓位於熱帶地區，天氣比較不穩定
預訂機票酒店及出發之前要清楚知道長灘島的天氣
但係由於長灘島面積較細，所以上網比較難搵到準確既天氣報告及預測 !
不過都俾我搵到啦 !
呢個天氣網站係由一間長灘島既酒店 Blue Bayou Cottages 自資設立的
每一分鐘會透過置於我住既果間酒店 Pahuwayan Suites 門口的Freestyle Academy 既 webcam 上載 Bulabog 既即時相片 !
( 當然夜晚係唔會有相片上載啦，我都試過特登走到 webcam 前搏上鏡 ~ 不過返到酒店房已經 check 唔切 ! 哈哈 )
網店既設立原意係方便一班 kite surfing 發燒友緊貼長灘島既天氣 ~ 自然唔會將 webcam 對住 white beach 啦 ~
不過呢個網店真的十分方便，除即時天氣報告外，仲有七日天氣預測，出發前必睇 !
http://www.boracayweatherstation.com/
*Update on 30/09/2012
除此之外，仲有另外一個網站都有長灘島既詳細天氣資料及預測，可以俾大家做個參考
http://www.wunderground.com/weatherstation/WXDailyHistory.asp?ID=IAKLANBO2
另外，長灘島既雨季由五/六月至九/十月
我今次就係九月尾去，差不多每一日都有落雨，平均每日都有1X-2Xmm 雨量
就算無落雨都會有好多雲，就連長灘島出名既日落都俾厚厚既雲層遮擋住
而由於雨季其間長灘島既風向會由東南 ( 即吹向 Bulabog beach ) 轉為西北 ( 即吹向 White beach )
所以成個 white beach 都係枯枝落葉，仲要十分大浪，加上沿著white beach 既酒店都會建起一道道既防沙紗網，真係令到成個風景失色不少。
不過，由於已經係雨季既尾聲，所以通常正午 12:00 至下午 17:00 呢段出去玩 outdoor activites 既黃光時段都會有陽光～
雖然談不上係藍天白雲，不過都足夠令大家曬傷！
但整個長灘島既感覺不論日夜都變得冷清得多，大概係因為天陰落雨，失去了那種「同陽光玩遊戲」既感覺吧。
所以呢...如果大家係第一次去長灘島朝聖的話，強烈建議大家於旺季其間去就最穩陣！
正所謂，有圖有真相
以下係一月旺季時影既相
以下係九月淡季時影既相
5. 地圖
出發前用左好多時間去搵長灘島既地圖... 真係好難搵 !
雖然長灘島唔大，路都係果幾條，不過有張地圖在手總算對不同商店食肆櫃員機既位置有一個概念，都會安心一點 !
雖然於 Caticlan Jetty Port 有得拎一小本地圖仔，但內裡超多廣告，而且真係好細本！
所以要分享幾張於網上搵到，解像度較高及就住我既 blogs 而有少少修改既地圖俾大家望望
不過呢幾張地圖都唔係最新既... 所以部分店鋪無出現於地圖上
( 希望上載後唔會令解像度下降太多啦... 如果有需要可以留 comments 我 send e-mail 俾你地 )
先來一張 White beach 地圖
紫色正方框是於之前的 blogs 有提到的食肆及 diving centres
D' Mall 地圖
紅色正方框是於之前的 blogs 有提到的食肆及相關商店
Bulabog 地圖
紅圈就既 Freestyle Academy Resort 其實就係我住既酒店啦
*Updated on 30/09/2012
第二次去完長灘島，再影左幾張地圖俾大家參考一下
呢張大地圖應該就最全面架啦，不過 upload 上 yahoo blog 既相都變得好細
有需要就問我啦 ~ 有超級清楚仔細既 PDF ！
*Updated on 03/10/2012
6. 當地交通
其實大家睇過網上既資料都會知道，長灘島上主要的公共交通公具為 Tricycle。
大家由Station 1-2-3 之間來回大約是 50peso 一程，D’Mall 至 Bulabog 約 75-100peso，而D'Mall 至 Diniwid 則約100peso。
不過，要跟大家分享的旅遊貼士當然不是如此普通在網上可以搵到的資訊啦！
其實，大家可以在 Main Road 上叫停任何一架載有當地人既 Tricycle，
上車前先同司機講去邊 ( 範圍當然是 Station 1-3 啦，如 D'Talipapa 至 Willy's Rock )，如果司機話 OK，就可以上車！
有咩咁特別？特別既就係如果係搭呢一種 Tricycle 的話，只需 10peso/pax！其實真係平唔少架！
不過，呢種Tricycle 在繁忙時間都幾難搵架！
7. 另類娛樂
大家去到長灘島，總係離不開 island hopping、ATV、Parasailing、Scuba diving、sunset sailing ........
講起都覺得無咩新意！如果大家都想玩一點新奇刺激又與眾不同的活動，長灘島仲有一種較少人知既活動可以俾大家玩！
我第二次去長灘島就係為左去呢度！！不過最後因為天氣問題，海浪太大而被迫取消左...
呢個地方就係叫做 Ariel's Point！
呢個係一個全日既活動，會載大家到一個離島玩～
1500peso/pax，由早上 11:00 玩到下午17:00，包小食，BBQ午餐，下午茶，仲有飲品任飲！( 只可揀一種飲品 )
而活動方面包括浮潛、釣魚、獨木舟等
不過，去 Ariel's Point 既目標只有一個！就係挑戰自己既極限！
因為島上係設有數個不同高度既跳板！有 3M , 5M, 8M 及 15M 等的跳板 ！真係好瘋狂！
其實今次去唔到 Ariel's Point 真係超級失落，只能轉載幾張由 Ariel's Point Facebook 既相片俾大家睇下啦～
如果大家有興趣的話要到位於 Station 1 既 Boracay Beach Club 度預約，記得早一日之前去預約！
因為有可能好似我咁因為天氣問題而取消行程架！仲要一取消就連續幾日去唔到啦！
大家記得去 Ariel's Point 幫我完夢呀！！！！！
Boracay Beach Club 其實於位 Station 1的 Main Road
不過建議大家沿著 White beach 找，佢地在 White beach 上開設了酒吧，進去後就會有職員帶你去酒店做預約架啦！
可參考下圖，照片背景就係 Willy's Rock，可大約知道其位置。
詳情可參考 Ariel's Point 既 official website & Facebook page：
http://www.arielspoint.com/ariels-point.html
http://www.facebook.com/arielspoint
8. 插頭制式及電壓
菲律賓既插頭係兩腳扁型，即係同中國內地既插頭一樣，所以大部份香港既電器都要帶轉插！日本城及一般電器鋪都有得賣！
而電壓方面，菲律賓的電壓為 220V，與香港一樣。
另附上一個十分實用既網站，羅列了各國的電壓及插頭制式，去旅行必睇！
http://www.yung-li.com.tw/tw/info/ww_specifications.htm#asia
大致上必須要知道既資訊都有打到啦 ... 希望幫到大家啦 !
如果有任何問題就再留 comments 問啦 !
打呢系列既 blogs 係想大家都有機會可以接觸到長灘島呢個地方
但係同時亦唔想長灘島過度發展有太多旅客而失去了原本的美
所以希望大家去長灘島既時候... 欣賞大自然既美之外，都要著重環境既保護 !
唔好破壞長灘島呢個世外桃園 !
2012 長灘島之旅就此結束 ! 有緣再見啦 white beach :D
沒有留言:
張貼留言