再次列出回程航班資料：
27 Sept Kalibo -> Clark 16:55 - 18:00
28 Sept Clark -> HKG 07:20 - 09:15
28 Sept Clark -> HKG 07:20 - 09:15
如果大家記得，去程既時候 Clark 至 Kalibo 只需約半個鐘，所以今次呢班機都係比原定早左約半小時到達 Clark。
由於呢班機係國內航班，所以落機後並不需要過 Immigration，直接拎行李就可以走人！
市內交通
一出到機場就會有好多人圍過黎搵你搭車架啦。之前都有講到， Clark DMIA (即機場 ) 到市區如SM City，距離約8km，有兩種交通工具，分別係 Taxi 及Jeepney：
Taxi 的話，唔需要煩，直接去到酒店，價錢大約300 - 350peso。而當地都有唔同車款既 Taxi，七人車及貨Van款式都有，可以坐6-8 個人，人多的話坐 Taxi 有著數！
Jeepney的話，只會車到你去 SM City / Main gate。價錢為 50peso/pax，無需講價。你只需要同司機講定你係去 SM City / Main gate 即可。
Jeepney 入面都幾迫架！特別係當大家都有好多行李！不過呢間 Jeepney 已經係機場豪華版！因為Clark 市內既 Jeepney 都係無冷氣同埋殘舊好多架！
由於搭Jeepney 係比較複雜及網上亦較少關於 Clark 既資訊，所以我會仔細地為大家講解一下。
先跟大家簡單介紹一下 Clark 呢個地區。 Clark 既正名應該係 Clark Freeport Zone，前身有一個美軍空軍基地，而當年既空軍機場就係今時今日既 DMIA。而 Clark 既特別之處就係佢係菲律賓境內其中一個經濟特區，部分國家既國民去 Clark 係免簽證的。所以亦都洐生左 Clark 既周邊地區理論上係應該會設立關卡，清楚介定經濟特區既範圍及防止免簽證人士離開 Clark Freeport Zone 既範圍，呢個亦都係所謂「Main gate」既由來。而嚴格黎講，當你搭 Jeepney過左Main gate，你就身處於一個叫做 Angeles City 既城市架啦。不過，大家都係直接將 Clark 周邊既旅遊區歸納為 Clark 既一部分！
而大家上網搵有關 Clark 既交通資料既時候一定會見到「SM City / SM Mall」及「Main gate」呢兩個地方，但通常搵到既資訊都十分含糊不清，所以我再清楚地解釋一次。
首先，SM City / SM Mall 係當地既一個超級大型商場，亦係當地既一大地標。
而沿著 highway 過了SM City 附近就有檢查站，就係所謂既 Main gate 啦 ( 不過從未見過有任何一架車係需要停於檢查站被檢查的 )。
以下地圖為 Clark 市內的主要地標
由於 Main gate 係位於 Highway之上，所以如果你搭 Jeepney 的話會再駛遠少少，至見到菲律賓既美式快餐店 Jolibee。通常由 DMIA 到 Clark 市內既 Jeepney 都會在此附近放你落車！
由於 SM City 及 Main gate Jeepney drop-off point ( 即 Jolibee ) 其實只係相隔一條Highway，所以網上既資訊都會將兩者混為一談！但係其實兩者步行就近，坐車的話就要兜路架啦！
當你於 Jolibee 附近落左車，咁你又離你既酒店近左一步啦！
落左車之後，你有兩個方法搭車去你既酒店。
1. 去到市內已經無 Taxi 搭架啦，所以係搭 Tricycle。
不過呢度既 Tricycle 同長灘島上既好唔同！長灘島果Ｄ隨時可以坐到八個人，不過 Clark 既 Tricycle 最多只可以坐三個人，行李多少少大件少少都坐唔到架！ 以我住既 Tune Hotel 為例，距離 Jolibee 約 1.5公里，搭Tricycle 約100peso，可嘗試講價至 70peso。
2. 想省一點旅費及感受一下菲律賓當地交通，可以再轉搭 Jeepney。大家可以參考以下兩張地圖：
於 Jolibee ( A )向西南方向行一個街口，約150m，至 Main gate Friendship Terminal ( B )。
Friendship Terminal 係當地既 Jeepney 總站，站內分開左兩格，有分東行方向及西行方向既車，所以上車前要問問司機是否方向正確及經唔經你果間酒店。以 Tune hotel 為例，係搭向西行既 Jeepney 架！而搭 Jeepney只需公價8peso/pax！真係好平！記得上車俾錢就可以了。
另外，如果大家返到酒店想去市內及 SM City 逛逛的話，都係在酒店樓下隨便搭架方向正確既 Jeepney 回 Friendship Terminal 再行返去 Jolibee過去就可以了～ 由 Tune Hotel 去 SM City 只需約 15分鐘。
市內食肆及消費
講完交通再同大家介紹一下 SM City。正如之前在出發交通篇題到，SM City 係一個十分大既商場，真係行一日都行唔哂！所以大家黎到 Clark 無野做又或者唔知晚餐點算的話，黎 SM City 就一定解決到問題！長灘島上既 Shakey's Pizza, Yellow Cab等餐廳在此都有分店，商場入數十間餐廳有排你食！
另外，SM City 內有Department Store 及 Hypermarket，都係十分適合大家作最後衝刺買手信的！
而 Hypermarket 內仲有 Foodcourt！
注意！一定要注意的是，SM City 係九點關門的！所以大家記得預留多一點時間啦！
另外，如果大家由 Jolibee 行去 Friendship Terminal 既時候，中間有一間幾大既Mr. JJ’s Supermarket ( B )，可以買下零食飲品補充一下，甚至買手信！ 仲係24小時營業架！而除左呢間 Supermarket，Clark 市內都有好多 7-11 & Ministop 的。
我就買左一包十件既椰子斑蘭蛋糕仔～味道不錯！只係 53peso～而Supermarket外既 Buko Shake，即椰子沙冰，都係十分好飲又抵飲！在 Clark 市內僅僅 3 小時既活動時間就已經入左超過 2Liters Buko Shake！！個人建議少糖甚至半糖已經好夠甜！
另外， Clark 其實係有十分多姿多采既夜生活，不過我諗大家都唔會有興趣架啦，都 Upload 張 Clark 市內一片繁榮既景象俾大家睇睇。
不得不提，菲律賓其中一種十分普遍既街頭小食，鴨仔蛋... 5peso only
大家有興趣可以試下...
市內住宿
Clark 都有好多間酒店，而我地揀的 Tune Hotel 係同 Air Asia 同一集團經營的。同樣地，呢間酒店係出名平！不過冷氣、無線網絡、電視、沐浴露，毛巾等逐一收錢 ! 最平約一百三十港元有交易 ! 我們則加了十二小時的冷氣。
附上數張我間酒店房既真實照片俾大家參考一下！
另外，Tune Hotel 既大堂有個螢幕可以影相及即時 post 上 facebook 或send 去email！都幾好玩架！
話咁快到了第二日，我地既飛機係07:20 起飛。
簡單快捷的話，大家可以叫酒店幫你叫Taxi去 DMIA，收費350peso。
而大家如果想搭 Jeepney的話就可以參考一下我的行程啦。
約05:20 check out，到酒店樓下搭Jeepney 到 Friendship Terminal，再行到 Jolibee。過左馬路就會見到另一個 Jeepney Terminal ( D )，周圍問下人就會知邊架Jeepney係去 DMIA 架啦，因為菲律賓係唔會好似香港咁清晰地有個牌寫住每架車去邊架！
搵到Jeepney 之後你有兩個選擇。
1. 自己包一架Jeepney，250 peso。
2. 可碰下運氣，等下有無人都係搭 Jeepney 去DMIA。根據司機既說法，如果有六個人或以上，就會收50peso/pax。
個人黎講，建議大家叫酒店搵定 Taxi，因為價錢真係唔差得遠，而且省卻不少麻煩，我都係特登搵多一點資料打 Blog 同大家分享先會行咁多路去搵 Jeepney搭架咋！
十多分數既車程，最後一次在菲律賓睇日出。
去到機場之後都係先過 X-Ray。
注意！過完X-Ray 之後右面會有得拎張Emigration card，離境人士都要填架！記得啦！
填完 Emigration card 之後可以去Air Asia counter check-in，之後就可以去俾Terminal Fee，國際航班記得用右面既櫃位交錢，價錢係 600peso。交完錢就可以排隊過Immigration 啦。
又要注意啦！06:00 - 08:00 有幾班國際航班起飛架！所以都有會幾多人出境，雖然果度有六個出境既櫃位，不過當地既職員做野係超級慢！攪到打哂蛇餅塞滿哂人！剩係等過關已經等了差不多一個小時，差不多每一班航機都係因為呢個出境櫃位而要遲起飛架！更有唔少旅客因為自己既航班 Final call 而打尖，但係佢地無留意到，其實排佢地前面果幾十人都係同一班機架！去到最後更加係每個人都唔再排隊衝向櫃位！完全無哂秩序，真係十分混亂！
有見及此，建議大家早 1.5 - 2小時去到 DMIA 準備過關！
過完關之後再十分馬虎地過一次X-Ray就可以登機了～
最後早了十分鐘到達香港！
而今次超抵長灘島之旅亦正式結束！
之後會再陸續 upload 去長灘島食 + 住 + 行 + 玩 攻略！
大家耐心等等！
如有任何問題，歡迎留言，盡我所能為你們解答！
之後會再陸續 upload 去長灘島食 + 住 + 行 + 玩 攻略！
大家耐心等等！
如有任何問題，歡迎留言，盡我所能為你們解答！
沒有留言:
張貼留言