Salt and Sugar: 27-09-2012 長灘島 Boracay 自由行 2 – 向長灘島再出發回程交通篇 (一) Boracay

話咁快第二次長灘島之旅要完結了，先再次列出回程航班資料：

27 Sept Kalibo -> Clark 16:55 - 18:00
28 Sept Clark -> HKG 07:20 - 09:15

我地大約下午一點由 D’Mall 搭車去 Jetty Port。同樣地，Station 2 去 Jetty Port要 100peso。

不過！今次司機並唔係車我地去之前黎長灘島果個 Jetty port！而係去左一個沙灘！果度有間茅屋賣緊船票去 Caticlan及車票去 Kalibo。船票至 Caticlan 25 peso/pax，船票連車票至 Kalibo 200peso/pax，其實都真係幾平 ( 去程船票及車票要 280peso架！)。
不過當時都真係幾徬惶，因為果度係無人收 terminal fee & tax 架！感覺上好似並唔係真既 Jetty Port 咁… 唔知係唔係 Tricycle 司機同佢地夾埋既送我入虎口！去 Kalibo 果程又唔知係搭咩車，真係唔敢幫襯買船票車票！！不過左望右望又見唔到真正既 Jetty port，所以最後只係買左船飛～諗住去到 Caticlan Jetty Port先再睇睇揀下有咩車可以搭去 Kalibo。

就係下圖呢間茅屋啦！

船票跟正常碼頭賣的船票一樣是 25peso 的。

今次真係搭螃蟹船啦，不過開船之前，船員捲開一張透明軟膠擋住所有既船窗。行途中就明白啦！原來真係十分十分大浪！就算已經有呢塊軟膠擋住，不過當一個大浪打在船身上的時候，都會成身濕透！真係濕到由頭到腳都滴水果種！

睇下出面幾大浪！

再睇睇張登幾濕！

好不容易經歷左十多分數既顛簸，終於去到碼頭。不過呢個碼頭都唔係平時出入長灘島果個 Caticlan Jetty Port黎架喎！唔通今次真係上左賊船！

上岸後就開始落大雨啦！行過碼頭之後就見到一個停車場。果度有Southwest既Booth，而附近都係民營既細Van，就咁望落去細Van普遍都幾新淨幾好，所以就去問一問價，只係175peso！其實同之前於 Boracay 沙灘果個亭所賣既價錢係一樣的，不過起碼我宜家見到架車係點，才放心買車票！

呢種細Van係12座的，等齊人先會開車。不過車上乘客大部分都係當地人，都係去 Kalibo 市區，而唔係去機場的～

等客期間左望右望之下，發現呢個地方叫做 Tabon Terminal，可供大家參考一下。

搭呢種細Van除左價錢較平之外，就係快好多！

唔似去程既時候搭 Southwest 既大巴咁，沒有所謂既「toilet break」，而由於車身較細，容易超車！所以今次只係用左 90分鐘就去到機場啦！

補充資料：

透過沿途既觀察及返到香港再搵返資料，原來於長灘島上 Tricycle 司機載我去既沙灘叫做 Cagban Beach，應該係長灘島天氣唔好既時候，原來的碼頭因太多浪不能正常上落的話就係用呢個後備碼頭！可參考以下地圖，Cagban Beach 在長灘島的南面，在真正的 Jetty port 的西面。

而 Cagban Beach 係唔需要收 Terminal Fee & Tax 的，不過都係會有碼頭既Porter 見你一落 Tricycle 就衝過黎幫你拎行李！唔想俾20peso小費的話就記得自己拎返行李啦！
另外，Caticlan Jetty Port 都因海浪關係而不能上落客，所以會轉用 Tabon Terminal。Tabon Terminal 都會有車返到去 Caticlan airport。

大家如果遇到同樣既情況就要留意啦，Cagban Beach 既車票都係細Van來的。如果大家想搭大公司 Southwest既車，就可以好似我咁先買船票去Caticlan，到 Tabon Terminal 再去 Southwest 既 Booth 買車票啦。由碼頭行去停車場左轉就會見到Southwest 既Booth。

睇下搭細Van超車幾方便！